సుబ్బరాయ శతకము

 

శ్రీ గురువర ! నాథ ! శ్రీరామచంద్రజీ

మీరె మాకు దిక్కు వేరె లేరు

శరణ మనుచు మీదు చరణమంటి చెబుదు

సుబ్బరాయ వినర సూనృతోక్తి                                    1

 

హృదయకమల మందు నీశ్వరున్ స్థాపించి

మనసు నటుగ ద్రిప్పి మసలు కొనిన

ధర్మమార్గ మతడు తప్పుట జరుగదు

సుబ్బరాయ వినర సూనృతోక్తి                                    2

 

హృదయ మందు వెలసి కదిలించుచున్నాడు

నిత్య మీశ్వరుడను నియతి నుండ

వానికేల యంటు వాసనాఫలితముల్

సుబ్బరాయ వినర సూనృతోక్తి                                     3

 

లేనితావులేవి లేవని విబుధులు

విష్ణుమయము సర్వ విశ్వమనిరి

కనుక హృదయ మందు కలడన నొప్పదే

సుబ్బరాయ వినర సూనృతోక్తి                                    4

 

దైవమునకు లేవు తలలు కాల్సేతులు

స్వచ్ఛమైన యట్టి సత్స్థితియది

అన్నివేళలందు అంతట నుండును

సుబ్బరాయ వినర సూనృతోక్తి                                    5

 

సృష్టిజేయు కాచు చివర లయమొనర్చు

పనులు వేరె కాని ప్రభువొకండె

బ్రహ్మ విష్ణు శివుడు పరికింప నొక్కటే

సుబ్బరాయ వినర సూనృతోక్తి                                    6

 

దైవమునకు లేరు తనవారు పెరవారు

సర్వజీవులకును సముడు హితుడు

మ్రొక్కువారలెంతొ మ్రొక్కనివారంతె

సుబ్బరాయ వినర సూనృతోక్తి                                      7

 

కర్మఫలము లిచ్చి కల్మషముల బాపి

శుభ్రపరచి శివుడు సుగతి జూపు

వాంఛ లెల్ల దీర్చువాడుకాడీశుండు

సుబ్బరాయ వినర సూనృతోక్తి                                     8

 

ధ్యాస దైవమందు దవిలి యుండుటకునై

పూజలెన్నొ చేసి పొగడవచ్చు

నంతెగాని ఈశు డట్టివి గోరునా

సుబ్బరాయ వినర సూనృతోక్తి                                  9

 

బాహ్యపూజ కొఱకు బహుగ వ్యయము చేసి

గొప్పలిలను జెప్పుకొనగ నేల

లోననున్న వాని పూని చింతించరా

సుబ్బరాయ వినర సూనృతోక్తి                                    10

 

సక్రమముగ ధనము సంపాదనముచేసి

దేవుడిచ్చె నిజము దీని ననుచు

ధర్మకర్తరీతి తగ ఖర్చుజేయర

సుబ్బరాయ వినర సూనృతోక్తి                                    11

 

శుభముపేర మరి యశుభముల పేరునన్

వ్యయము మించి చేయ నయముగాదు

పరిమితులను దాట పాడిగాదిలలోన

సుబ్బరాయ వినర సూనృతోక్తి                                  12

 

దైవతత్త్వము మితభావమందు గలదు

మితము మనల కెంతొ హితము గూర్చు

మితము జీవితమున సతముపాటించరా

సుబ్బరాయ వినర సూనృతోక్తి                                    13

 

పాపపుణ్యములకు ఫలితముల్ పొరలౌచు

చుట్టివైవ నాత్మ గట్టిగాను

తత్త్వమెఱుగు శక్తి తాను గోల్పోవును

సుబ్బరాయ వినర సూనృతోక్తి                                    14

 

శాస్త్రపరిధి దాటి చాలదూరముపోయి

తత్త్వ మెఱుకపరచు దైవలీల

హేతువాద దృష్టి యెంత దవ్వేగురా

సుబ్బరాయ వినర సూనృతోక్తి                                    15

                       

కానబడున దంత కాదులే సత్యంబు

నేత్రపరిధి దాటి నిజము గలదు

తిరుగు చున్న భూమి నరయునే నేత్రంబు

సుబ్బరాయ వినర సూనృతోక్తి                                    16

 

స్వాముల మని చెప్పి సాంతము చెడగొట్టి

ద్రోహబుద్ధి తోడ దోచుకొనగ

హేతువాదు లింక హేళన చేయరా

సుబ్బరాయ వినర సూనృతోక్తి                                    17

 

పాప భయము వల్ల పదిమందికిని మేలె

పాపభీతి మరియు పరలోక శిక్షలు

నమ్మవలదటన్న క్రమ్ము నఘము

సుబ్బరాయ వినర సూనృతోక్తి                                   18                                               

 తప్పుచేయ వచ్చు తప్పించు కొనవచ్చు

చట్టములకు టోపి పెట్ట వచ్చు

కాని తిరుగులేదు కాలుని శిక్షకున్

సుబ్బరాయ వినర సూనృతోక్తి                                    19

 

తప్పు జరిగినపుడు తగుశిక్షబడుటచే

క్షాలనంబు జరుగు సమయు నఘము

రాజదండనంబు రానీదు కాలుని

సుబ్బరాయ వినర సూనృతోక్తి                                    20

 

పుణ్యపాప ఫలము భోగింతురిలలోన

అదియు కొంత మిగుల అసువులుడుగ

స్వర్గనరక మరగి వాటిని బొందరే

సుబ్బరాయ వినర సూనృతోక్తి                                    21

 

పుణ్య పాపములకు పోలిక కలదులే

కుందనంపుటినుప గొలుసులివియ

కట్టివైచు మరల కర్మభూమికి నెట్టు

సుబ్బరాయ వినర సూనృతోక్తి                                    22

పాపపుణ్య ఫలము బాపుకొనుటెకాదు

తపము చేయుటకును తగునుభూమి

చేయనగును తపము సాయుజ్యమునుబొంద

సుబ్బరాయ వినర సూనృతోక్తి                                    23

 

దివిజులైన గాని దిగివత్తురిలపైకి

తపము చేయ నిదియె తగునటంచు

ధరణిమహిమ దెలిసి ధన్యులుగావలె

సుబ్బరాయ వినర సూనృతోక్తి                                    24

 

సుఖము మాత్రముండు సురలోక మందున

వేదన పడ నచట వీలు పడదు

తపన పడక యున్న తత్త్వంబుతెలియదు

సుబ్బరాయ వినర సూనృతోక్తి                                    25

 

అహము తొలగి పోవ సహనము పెంపొంద

చేయ వలయు దైవ చింత నంబు

కొర్కె లిలను దీర్చు కొనుటకు గాదురా

సుబ్బరాయ వినర సూనృతోక్తి                                    26

 

కోరికలిల దుఃఖ కారణంబని తేల్చి

బుద్ధదేవుడు ఘనబోధ చేసె

కోరికలన తగని కోరిక లేనురా

సుబ్బరాయ వినర సూనృతోక్తి                                    27

 

కోరె మోక్ష మనిన కోరిక యేగదా

కానదోష మగునె కాంక్షలెల్ల

సతతము హితమెంచి సమ్మతిబ్రతకరా

సుబ్బరాయ వినర సూనృతోక్తి                                    28

 

కామక్రోధములను క్రమమున తగ్గించి

సహజరీతి వసుధ సాగవలయు

దైవచింత గలుగ దారితప్పగలేవు

సుబ్బరాయ వినర సూనృతోక్తి                                    29

 

క్రూరత మదిగల్గి కోపగించగరాదు

బుద్ధి గరుప నలుక బూనవచ్చు

కొడుకు చదువకున్న కోపముసేయమా

సుబ్బరాయ వినర సూనృతోక్తి                                    30

 

కన్నతల్లిచూపు కరుణార్ద్ర దృష్టిచే

బిడ్డహృదిని మృదుల ప్రేమనిండు

దాదిపెంపకమున దయయు కరుణనాస్తి

సుబ్బరాయ వినర సూనృతోక్తి                                    31

 

కనులు మూసియుంచి కాశగుడ్డయుగట్టి

ఆర్ద్రకరుణ దృష్టి నడ్డు కొనగ

కఱకు మనుషులైరి గాంధారి కొడుకులు

సుబ్బరాయ వినర సూనృతోక్తి                                    32

 

తనకుతగినరీతి ధర్మార్ధమున్ ద్రిప్పి

పలుకువాడు ధర్మపరుడు గాడు

త్రిప్పిధర్మమిట్లు ధృతరాష్ట్రుడున్ చెడె

సుబ్బరాయ వినర సూనృతోక్తి                                    33

 

పుత్రదురభిమాన పూరితంబు జగము

కొడుకుపక్ష మెవడు విడచి చనడు

సుతుని విషయ మన్న  ధృతరాష్ట్రులందురు

సుబ్బరాయ వినర సూనృతోక్తి                                    34

 

నిజము పలుక వలయు ప్రజహింస బడకుండ

బ్రతుకులార్పు నిజము హితముగాదు

కల్లయైన మేలె కాచిన దీనునిన్

సుబ్బరాయ వినర సూనృతోక్తి                                    35

 

తల్లిచచ్చెననుచు ధర్మరాజు పలికి

శస్త్రములను దాచె జమ్మిమీద

తప్పుబలికె నంతె ముప్పుగాదెవరికి

సుబ్బరాయ వినర సూనృతోక్తి                                    36

 

ధర్మరాజు మదిని నిర్మలత్వము లేక

పలికె సత్యమనిన పాడియగునె

గురుని చావుగోరి నరకవీధుల చనె

సుబ్బరాయ వినర సూనృతోక్తి                                    37

 

పలుక వలయు నెపుడు పరహితమ్ముదలచి

మాట కల్ల నిజము మనసెఱుంగు

పరహితంబు గాని పలుకులు వృధసుమ్ము

సుబ్బరాయ వినర సూనృతోక్తి                                    38

 

కూడు బెట్టకున్న కొడుకుతప్పన బోడు

కోడలె చెడగొట్టె కొడుకు ననును

ఆలుచెప్పె బొమ్ము అతనిబుద్దేమాయె

సుబ్బరాయ వినర సూనృతోక్తి                                    39

 

హింసజేయకుండ నిలజీవనమెలేదు

ఆకుకూరలు దిన నదియుహింసె

యెంత హింసతగ్గ నంతశుభమ్మురా

సుబ్బరాయ వినర సూనృతోక్తి                                    40

 

విశ్వజీవులెల్ల విశ్వేశుబిడ్డలే

వాటి తలలు దరుగ చేటుగాదె

చాలమేలు సుమ్ము సాత్వికాహారమ్ము

సుబ్బరాయ వినర సూనృతోక్తి                                    41

 

దివ్యజీవనమ్ము సవ్యము గాసాగ

మాంస భక్షణంబు మానవలయు

ఆమిషంబు దినగ నాత్మలాభము చెడు

సుబ్బరాయ వినర సూనృతోక్తి                                    42

 

మాట కఠినమైన మనసుల నొప్పించు

అదియు హింసెగాన నార్యజనులు

మెలగ వలయు ననిరి మృదుభాషణంబుల

సుబ్బరాయ వినర సూనృతోక్తి                                    43

 

దేశమందు గొప్ప దేశికులు మరియు

వేషగాండ్రు గలరు వివర మరసి

సద్గురు దరిజేరి శాంతిని బొందరా

సుబ్బరాయ వినర సూనృతోక్తి                                    44

 

సాధు సంతు జనుల సామీప్యమున నున్న

తొలగి పోవు జడిమ కలుగు శుభము

వారి చరణసేవ వడిగ సద్గతి గూర్చు

సుబ్బరాయ వినర సూనృతోక్తి                                    45

 

దీక్షచెదరనీని ధృడనిశ్చయము గల్గ

జయము ఖచ్చితముగ సాధ్యపడును

పట్టుబట్టకుండ ఫలితమేముండుగా

సుబ్బరాయ వినర సూనృతోక్తి                                    46

 

బాలుడయ్యుధ్రువుడు పట్టుబట్టిహరిని

వసుధపైకి దించె వరము బడసె

విడువకుండ బట్ట వీలు పడనిదేది

సుబ్బరాయ వినర సూనృతోక్తి                                    47

 

తిరిగిచూడనట్టి దీక్షసాగించుచు

జయముపొందు నిజము సాధకుండు

సంశయంబు గలుగ సాధనసాగదు

సుబ్బరాయ వినర సూనృతోక్తి                                    48

 

వేసి మెదటియడుగు విశ్వాసముగసాగ

బాధ్యత పరమాత్మ పైకి మారు

చక్కని తొలియడుగె సగము జయమ్మురా

సుబ్బరాయ వినర సూనృతోక్తి                                    49

 

 కదిలె భక్తుడన్న కదలును హరిమున్నె

 ధ్రువుని కొఱకు నారదు పిలిపించి

దారిచూప బంపి దర్శనంబిచ్చెరా

సుబ్బరాయ వినర సూనృతోక్తి                                    50

 

భక్తహృదయ మందె భగవంతుడుండంగ

గుడులు లేవనియెడి కొఱతయేల

యేగుడి కలదనుచు నేగె ప్రహ్లాదుండు

సుబ్బరాయ వినర సూనృతోక్తి                                    51   

   

 గుడులు విగ్రహములు గురికల్గువరకని

పలుక వచ్చు పిదప వదల లేరు

సూక్ష్మభావనలను చొరనీని పూజేల

సుబ్బరాయ వినర సూనృతోక్తి                                    52

 

సజ్జనులకు నలుక చాలసేపుండదు

తృణహుతాశనమ్ము తీరు నుండి

భగ్గుమనుచు మండి తగ్గి చల్లారును

సుబ్బరాయ వినర సూనృతోక్తి                                    53

 

చెడ్డవాని యలుక చాలకాలంబుండు

సమయ మరసి పరుల జంపజూచు

కాన దుష్టజనుల కడనుండరాదురా

సుబ్బరాయ వినర సూనృతోక్తి                                    54

 

ప్రక్కవాడు బాగుపడజూడ నోపము

పరులకలిమి తేదు తరుగు మనకు

ఉన్నవాడు ఊరి కుపకారి గావచ్చు

సుబ్బరాయ వినర సూనృతోక్తి                                    55

 

ఇరుగుపొరుగు చెడిన యెగిరిగంతేతురు

కారణంబు వెదుక కానరాదు

కనులయెదుట నొకని కష్టంబుగనమేలె

సుబ్బరాయ వినర సూనృతోక్తి                                    56

 

పాముతేలుకన్న పదిరెట్లు విషమున్న

కుచ్ఛితు దరి కేగ కూడదెపుడు

వాని జీవితంబు వసుధకే బరువురా

సుబ్బరాయ వినర సూనృతోక్తి                                    57

 

దశరథేశు మాట తలదాల్చెరాముడు

కనకకశిపు మాట వినెనె కొడుకు

తండ్రి మాట కన్న ధర్మాచరణ మిన్న

సుబ్బరాయ వినర సూనృతోక్తి                                    58

 

న్యాయదేవతకడ మాయమాటలతోడ

ధర్మహాని చేయ తగదు వలదు

అట్లుచేయు వాడు ఆపదలంబడు

సుబ్బరాయ వినర సూనృతోక్తి                                    59

 

భక్తగణము సొచ్చి భగవంతుడున్నాడు

బాధ పెట్టదగదు భాగవతుల

భక్తుల చెనకంగ భగవంతు డోర్వడు

సుబ్బరాయ వినర సూనృతోక్తి                                    60

 

భక్తజనుల బాధ బాపంగ రాముడై

యవతరించెను హరి యవనిపైన

అంతెగాని హరికి అరులెవ్వరును లేరు

సుబ్బరాయ వినర సూనృతోక్తి                                    61

 

భక్తు నంబరీషు బాధింప దుర్వాసు

హరిసుదర్శనంబు తరిమి కొట్టె

చక్రధాటి నాప చక్రియె కాదనె

సుబ్బరాయ వినర సూనృతోక్తి                                    62

 

వీరులెపుడు ఓడిపోరు యుద్ధంబున

పోరులందు ఓడిపోకమున్నె

వీరమరణ మంది చేరరేస్వర్గమ్ము

సుబ్బరాయ వినర సూనృతోక్తి                                    63

 

ధీరు జూచి చావు దూరము తొలగును

పిరికివాడు చచ్చు మరలమరల

ప్రాణభయము తోడ బ్రతుకుట వ్యర్థంబు

సుబ్బరాయ వినర సూనృతోక్తి                                    64

 

ఉన్నతుని వెనుకనె యుండును పతనంబు

అదనుజూచి వాని నణగద్రొక్కు

చెడెనజామిళుండు పడి వృషలి వలను

సుబ్బరాయ వినర సూనృతోక్తి                                    65

 

పతనమైన వాని ప్రక్కనె యుండును

మేలుపడెడి దారి మేలుకొనిన

వసుధ కఱకుదొంగ వాల్మీకి యయ్యెబో

సుబ్బరాయ వినర సూనృతోక్తి                                    66

 

పతనమైనవారు బాగుపడగజూచి

మంచివారు నియతి మారి చనక

జాగరూకులగుచు జగతినుండవలయు

సుబ్బరాయ వినర సూనృతోక్తి                                    67

 

ఇరుగు పొరుగు వారి హితమును గోరక

స్థలము నాక్రమించ గలదె మేలు

నేలవిలువ కన్న నెనరు కూరిమి మిన్న

సుబ్బరాయ వినర సూనృతోక్తి                                    68

 

ఆక్రమించి కట్టు ఆవాస మెప్పుడు

స్థలముగలిగి యిరుకు నిలువదగదు

పొరుగుచెలిమి చెడిన యిరవునిరయమురా

సుబ్బరాయ వినర సూనృతోక్తి                                    69      

 

బానిసనని తలుప భావ్యంబు గాదులే

తానె ప్రభువు ననుచు తగదు పలుక

సముడ ననుచు తలుప సక్రమమౌగదా

సుబ్బరాయ వినర సూనృతోక్తి                                    70

 

మూర్ఖునింట ధనము మూలుగుతున్నను

కలుగ దెట్టిమేలు విలువలేదు

పండితుండు వెలుగు పసిడిలేకున్నను

సుబ్బరాయ వినర సూనృతోక్తి                                    71

 

గురువురూపముననె పరమాత్మ కనిపించు

దైవము గన వేరు దారిలేదు

చర్మచక్షువుగన సౌలభ్య మియ్యది

సుబ్బరాయ వినర సూనృతోక్తి                                    72

 

జబ్బుచేసినంత నిబ్బరముగ నుండి

మందు వాడి మేలు పొందు నగును

కర్మలనుభవింప కాయ ముండవలయు

సుబ్బరాయ వినర సూనృతోక్తి                                    73

 

ఆత్మహత్యవలన నాగు కర్మఫలము

పూర్తిజేయ మరల పుట్టవలయు

పోయివచ్చుటేల పోకుండుటే మేలు

సుబ్బరాయ వినర సూనృతోక్తి                                    74

 

కష్టసుఖము లెల్ల కడదాక భరియించి

తిరిగిరాని లోక మరగ వలయు

ఇందు కొఱకె జన్మమెత్తితి మిలమీద

సుబ్బరాయ వినర సూనృతోక్తి                                    75

 

పుట్టినట్టి జీవి గిట్టుట సహజము

ఇట్టియెడల చింత యేలజెపుమ

జంకు విడచు టన్న చావుజయించుటే

సుబ్బరాయ వినర సూనృతోక్తి                                    76

 

కర్మఫలము లెల్ల ఖాళియై పోయినన్

పుట్టబోడు మరల పుడమి యందు

ఖాళియగుట కొఱకె కావలె తపనరా

సుబ్బరాయ వినర సూనృతోక్తి                                    77

 

ధరణి గలుగు కలిమి పరమాత్మకృపయని

ధర్మకర్తరీతి తాను మెలగి

కర్మలంట కుండ కాలమ్ముగడపరా

సుబ్బరాయ వినర సూనృతోక్తి                                    78

 

ఇహమునందు మిగుల హితకారియైనచో

పరము కొఱకు పాటు పడినయట్లె

ఇహము చెడిన పరముసహితము చెడినట్లె

సుబ్బరాయ వినర సూనృతోక్తి                                    79

 

శాంతి సహనమున్న సజ్జనులనుగని

శక్తిహీనులనుట చాలతప్పు

దంతి యెదుట కుక్క దర్పమియ్యది సుమ్ము

సుబ్బరాయ వినర సూనృతోక్తి                                    80

 

సంయమమున మెలగు సజ్జనుల కొఱకె

ప్రకృతి పులకరించి పంట పండు

గాన నట్టివారి గౌరవింప వలయు

సుబ్బరాయ వినర సూనృతోక్తి                                     81     

 

రవిశశి గగనమున ఛవితోడనున్నారు

పరహితమతులైన వారి కొఱకె

అన్యజనులు వారి అండన జీవింత్రు

సుబ్బరాయ వినర సూనృతోక్తి                                    82

 

కామక్రోధములను కట్టడి చేసితిన్

గెలిచితినని క్రొవ్వి పలుక దగదు

పోటిపడక నణగి దాటిపోవలయురా

సుబ్బరాయ వినర సూనృతోక్తి                                    83

 

బ్రహ్మసృష్టిజేసి భ్రమసి సరస్వతిన్

దారజేనుకొనియె తనయ యనక

కాముపై విజయము కాదురా సులభమ్ము

సుబ్బరాయ వినర సూనృతోక్తి                                    84

 

కామినీజనముల కవ్వింపులకు లొంగి

పోనివాడు లేడు పుడమి యందు

మేటి కౌశికుండు మేనక ఒడిజిక్కె

సుబ్బరాయ వినర సూనృతోక్తి                                    85

 

దారితప్పి నట్టి వారిని రక్షింప

దైవమవతరించు దారి చూప

అవతరించు వాని కంటవు కర్మముల్

సుబ్బరాయ వినర సూనృతోక్తి                                    86

 

జయవిజయుల కొఱకు జన్మించి శ్రీహరి

వారికర్మఫలము వారి కొసగె

అంతె గాని హరికి యంటునే కర్మముల్

సుబ్బరాయ వినర సూనృతోక్తి                                    87

 

హరిని చుట్టి యుండు నద్భుతముగ మాయ

కాని మాయకు హరి కట్టుబడడు

హరికి శరణ మనిన నంటదురా మాయ

సుబ్బరాయ వినర సూనృతోక్తి                                    88

 

మాయ పాలు బడని మనిషి భువిని లేడు

మమతలెన్నొ రేపి మాయజేసి

భ్రాంతిలోన ముంచు బాగుపడగనీదు

సుబ్బరాయ వినర సూనృతోక్తి                                    89

 

పుట్టినపుడు లేదు గిట్ట వెంబడిరాదు

అట్టిధనము కొఱకు అలుపులేక

శ్రమల కోర్చి తుదకు జమునిపాల్బడుదురు

సుబ్బరాయ వినర సూనృతోక్తి                                    90

 

నీటమునుగ దొరికె హాటకాభరణంబు

అదియు చేయిజారి అపుడెపోవ

మాయగ్రమ్మి నరుడు పోయెనాదనియేడ్చు

సుబ్బరాయ వినర సూనృతోక్తి                                    91

 

ప్రాప్తమెంత యున్న ప్రాప్తించునంతయే

ఫలములేదు సుమ్ము ప్రాకులాడ

కలిగినంతలోనె మెలగుము తృప్తితో

సుబ్బరాయ వినర సూనృతోక్తి                                    92

 

పైకమున్న నేమి ప్రాప్తము లేకున్న

కోరి తినెద మన్న కుదరదవని

మనసుదీర దినగ మధుమేహ మడ్డురా

సుబ్బరాయ వినర సూనృతోక్తి                                    93

 

పసిడి మట్టి యగును ప్రాప్తము లేకున్న

ప్రాప్తమున్న మన్నె పసిడి యగును

ప్రాప్తమెట్టిదైన పరుల దిట్టదగదు

సుబ్బరాయ వినర సూనృతోక్తి                                    94

 అంతరంగ మందు ఆత్మశుద్ధిగనుండ

చెఱచి నాము మనమె చేతులార

మలినయోచనలకు మసిబారులే ఆత్మ

సుబ్బరాయ వినర సూనృతోక్తి                                    95

 

మనసు దుష్టమనుచు మరిమరిదిట్టకు

మనసె బాగుపరచు మరల మనల

సవ్యరీతి మనసు సరిదిద్దగావలె

సుబ్బరాయ వినర సూనృతోక్తి                                    96

 

ధ్యానమభ్యసి0చి దైవమున్ ప్రార్థించి

మానసమును సక్రమముగ నడిపి

సంయమమున సాగ సాయుజ్య మబ్బురా

సుబ్బరాయ వినర సూనృతోక్తి                                    97

 

ప్రేమతోడ యెవరు పిలువలేదని యన్న

తప్పకుండ యతని తప్పె యుండు

కాన దోషమేమొ గమనించు కోవలె

సుబ్బరాయ వినర సూనృతోక్తి                                    98

 

నూరుపాళ్ళు మంచివారెట్లు గనరారొ

అట్లె చెడ్డవారు నవనిలేరు

మంచి చెడ్డ కలసి మనుషులైయున్నారు

సుబ్బరాయ వినర సూనృతోక్తి                                    99

 

పూర్తిమంచివాడు పుడమి బ్రతుకలేడు

బ్రతుకనీరు పూర్తి పతితు నిలను

మంచి కొంతమించ మంచివాడందురు

సుబ్బరాయ వినర సూనృతోక్తి                                    100

 

హానిచేసి నట్టి వానిని సైతము

సైచి మేలుసేయు సజ్జనుండు

నీచునైజమందు సైచుటన్నదిలేదు

సుబ్బరాయ వినర సూనృతోక్తి                                    101

 

 స్నేహితుండె మిన్న సిరిసంపదలకన్న

మిత్రుడెప్పుడు మన మేలెగోరు

లేరు మిత్రులన్న లేదురా సౌఖ్యంబు

సుబ్బరాయ వినర సూనృతోక్తి                                    102

 

ఈర్ష్యతోడ నుందు రిలపైన బంధువుల్

కలిమి గలుగ నిన్న పలుకరించి

కలిమి తొలిగె నేని కనబడ వెఱతురు

సుబ్బరాయ వినర సూనృతోక్తి                                    103

 

కలిమి గలిగినపుడు తొలగినయపుడును

స్నేహబంధ ముండు చెడని రీతి

పృథు చెలెమికి సాక్షి కృష్ణకుచేలులు

సుబ్బరాయ వినర సూనృతోక్తి                                    104

 

పరహితంబు దలచి పనులను జేపట్టి

నిర్మలమగురీతి నిర్వహింప

యట్టిపనుల యజ్ఞమనిరిగాదె బుధులు

సుబ్బరాయ వినర సూనృతోక్తి                                    105

 

స్వార్థపరత లేక సాగించు కార్యమ్ము

లిట్టెశుద్ధి చేయు హృదయ సీమ

నిర్మలహృదయమున నిండు వివేకంబు

సుబ్బరాయ వినర సూనృతోక్తి                                    106

 

లోనలేనిదేది కానరాదు బయట

లోని బురదె బయట కానబడును

శుద్ధిచేసి హృదిని శుభముల గనుమురా

సుబ్బరాయ వినర సూనృతోక్తి                                    107

 

అనుభవమ్మె మనిషి కసలు బోధసలుపు

పుస్తకమ్ము చదువ పోదు తమము

ఈతనేర్పగలదె యెంతపుస్తకమైన

సుబ్బరాయ వినర సూనృతోక్తి                                    108

 

సోకరాని జబ్బు సోమరితనమెన్న

కలిమి వాని చెంత నిలువబోదు

భూమికతని బ్రతుకు భూరిభారమ్మురా

సుబ్బరాయ వినర సూనృతోక్తి                                    109

 

చోరునైన వాని దారి మారగ జేసి

హితుని జేయ వచ్చు నెటులనైన

మందుని సరిజేయ మార్గమేలేదురా

సుబ్బరాయ వినర సూనృతోక్తి                                    110

 

మదిని మెదల వచ్చు మృదుల భావనలెన్నొ

పలుకవచ్చు నీతి పాఠములను

కాని చేతలందు కనబడవలె నవి

సుబ్బరాయ వినర సూనృతోక్తి                                    111

            

             మతము యొక్క అంత్యమే ఆధ్యాత్మికతోదయము.

            ఆధ్యాత్మికత అంత్యమే సత్యో దయము

            సత్యము యొక్క అంత్యమే వాస్తవానందోదయము

            అదియును  గతించిన మీదటనే గమ్యస్థానము చేరుదుము.

            మాటల కలవికాని  మహోన్నత స్థితి యిది.                                                                                                                                                               ---  మహాత్మా శ్రీ రామచంద్ర

 మహాత్మత్మా శ్రీ రామచంద్రజీ మహరాజ్ వారి

పాద పద్మములచెంత సమర్పితము

                                  -----పి. సుబ్బరాయుడు.